𝙈𝙀𝙏𝘼𝙑𝙀𝙍𝙎𝙀 𝙆𝙄𝙏𝙄 𝙃𝙄 𝙄𝙋𝙄 𝙃𝘼𝙈?

 

✒AstroMuon Kuki

Thumakai:

Metaverse hi High School kakai lai a keima lunggel ki lasuon toh kilou tah khat ahe.Kei in kana gel chu kijahmatna(communication) lang ahi. Tua hi eiho noum tah a munkhat apat mun dang network tower umna jousea kihouthei chu ihi tauve. Vanlaijol a communication satellite aset le kihoumatna hi thakhat phut a um loudi khat chu ahi. High School ka simlai kakhouva(Henglep) network jong um lou, ima kijahmatna di um lou, sepoy(Indian) ho'n PCO tobang anei u chu kihoumatna bou hi jeng ahi.Hiche laiya ka u len pen chu Rajasthan ana um in, kanu in genthei tah in hiche PCO apat chun Pathen nii le akihoupi ji'n ahi. Hiche apat kana gel khat chu vanlaijol a pat mit mu chang tah in kihoutheina/thuthotna thei um le kana ti jiy ahi. Tua smartphone a messages ikithot bang uva hin kibawl doh thei le tia kana gel ahi. Science ima jong kahe nai poun, ngaichatna khat kamu phaat a kana gel jing chu ahi. Hiche laiya chu Nokia snake game kichepna ho jong soh nailou, PCO khang ana hi nalai ahi. Phaat ahung che in Nokia Phone(Snake game umna hung um), aban a lim kithot theina hung um, 2-Generation(2G) phone hung um, aban a 3-Generation(3G) phone hung um ahi. Hiche 3G phone um laitah chu class xi &xii kasim laitah ahi. Masang a kana gel jing chu 3G phone khang a tua Mark Zuckerberg in Wristband Technology asem bang a keiman jong khut a pung ki but jiy bang hin technology khat messages ho van(space) a projection bawlna a kiman le hithei in te tia kana gel ahi. Kaboina chu iti messages chu space a project kibawl thei ding ham ahi. Aki-ngapna ding um leh film ho projector a kikho sah bang a khu hithei di ahi. Hiche van(space) kati hi Troposphere kaseina ahi. Hiche khel hi ka lungmitlha(imagination) kana gel phaah lou ahi😁😄Leiset hi layers nga in atum chah chu ahi. Hiche ho chu troposphere, Stratrosohere (vanleng ho lenna),mesosphere(Satellite,Space station umna), ionosphere, exosphere ahi. Aban a 4G Smartphone ahung um in aerospace engineering kasim le teleportation, virtual reality, Augmented reality, leh concept jat tamtah akisim le Facebook neipa Mark Zuckerberg bawl got ho hi kasei bang a kahin gel jing peh jeh chun hitheina di aum ding dan kahe thei taan ahi.PCO khang laiya chu 4G/5G khang hung lhung di hi jaanmang a jong kinei lou, gelna a jong kinei lou ahi. Hitobang bawldoh thei ho chu Pathen tobang a kigel jeng di ahi. Kasei noum pen chu kum 25 sung jeng a hitheiloudia kigel,jaanmang a kimatphat lou ho bon agui lhung tah le tua 𝙈𝙚𝙩𝙖𝙫𝙚𝙧𝙨𝙚 jong gui lhung tei ding het jeng thei ahi. Ipi hile Metaverse chung thu anasim suh ute.

Facebook CEO Mark Zuckerberg in 28th October, 2021 ni'n Facebook Social Networking Company chu Technology

Company(Metaverse) in ana khel ta'n ahileh vannoi a technology company ho keu hilou vannoi mipi jouse kihouna khat chu ahi jing in ahi. Metaverse tup-le-doi in lolhinna anei le eiho'n vangam itiu toh akikhetna um lou ding,tahsa tah a nabol theilou, na che theilouna, nagel jouse umsah theina chu ahi. Metaverse het thiemna ding a Dimensions(1D, 2D, 3D, 4D....etc), teleportation, hologram, Virtual reality(VR), Augmented reality(AR) leh cryptocurrency kiti thucheng ho comfortable ngai lheh in ahi.Hiche thucheng ho nahet loule awlmo hih in bailam tah a ihinsei diu ahi.Metaverse hi eipauva ledoh ding hile vannoi khellam(beyond the universe)ti thei ahi.Hiche thuchang hi 1992 kum a Neal Stephenson novel jih 𝙎𝙣𝙤𝙬 𝘾𝙧𝙖𝙨𝙝 a ana jaosah masat pen ahi. 𝙈𝙚𝙩𝙖 kiti hi Greek pao english a 𝘽𝙚𝙮𝙤𝙣𝙙 tina, 𝙫𝙚𝙧𝙨𝙚 hi 𝙪𝙣𝙞𝙫𝙚𝙧𝙨𝙚 tina ahi. 

Mihem te hi 3-spatial dimensions(length,breadth,height) sung a khosa chu ihiuve. Adung(length),avai(breadth) leh atung(height) um jeh a kiche phei thei, ki chesuh thei, kiche tou thei chu ahi.3-Dimensional(3D) world a khosa hi jong leu hen 3D lim vetna di tahsa tah a koima'n anei theilou 2D lim bou imu thei u ahi. Hiche 3-spatial dimension khel a hi dimension dang phaat ( 𝙏𝙄𝙈𝙀) um kit, hiche jeh a hi dimension thum ho chu um thei bep a ahi. Phaat(Time) kiti hi dimension khat bou hi jongle ama jaulouva adang ho pannabei ahi kit uve.3D view hi cinema ve kha ho'n ahet diu ahin ave khalou ho hetdia chu Cinema ticket ilah ding phaat le 3D screen khat um ahi. Hiche khu nalah le mitbeh khat hin peuvin ti'n nakibeh a na vet le 3D view kiti chu namu di ahi.Tekahna,x,y leh z graph (Blackboard) na jih phaat le x-line leh y-line bou adih tah ki jih thei ahi.Hiche 2D surface chu het hahlou tah a muthei ahi. Z-line chu blackboard a jihmo hilou hinlah physical reality a het hahsa tah ahi. Adih tah a jih ding hile blackboard apat Z-line hung potdoh ngaiya ahi.Physical reality a um thei lou jeh a hetnoupna dia bkackbaord onglai khat a kijih jiy ahi. Hiche bang a Cinema 3D screen vetdi phaat le mitbeh kijah luona chu mitkeo(naked eyes) a 3D view kimutheilou ahi. Hiche x, y leh z baitah a hettheina ding chu METAVERSE in jong abawl got ahi. Hiche um theina dia chu Augmented Reality(AR) glasses ngaicha ahi. Hiche chu ikibeh leh 3D world mutheina ahi.

Titanic director James Cameron in abawl Avatar(sci-fi movie) hi Metaverse tohgon toh kibang chu ahi.Hiche movie hi $500 million(Hollywood movie bawl lah a mantam pen)lut a ana kibawl chu ahi. Hiche film a US Armed Forces in van(space) akholnauva leiset tobang lha(amin Pandora)khat amu doh nau sung a leithao chu leiset a manchah dia analah doh got u ahie. Hiche thaomantam leiset a pohlutdi ngaituona anei nauva amun a chen Na'vi nam mite(alien 👽) itobang mi hiu ham hetchenna um lou jeh a leithao ladoh(extraction) vah theilou,alhahsamnau leh ahatnau kholdoh dia Jake Sully(gollhangpa) asol ule hiche Naavi haosapa chanu Neytiri toh lungset hinkho aman khah dan thusim atah lang keu hilouva akidounau jong atahlang ahi.Jake sully Na'vi mite akisuo di teng Lab a um box sung tobang khat a alup le khohettheina(consciousness) mun gamlatah mit phet kahlouva kichonthei(teleportation), leiset a kengbai pa jong van(Pandora) a galsat lamkai ga pan peh ahi. Hiche Na'vi mite tobang akisuona lim chu Avatar kiti ahi.Mihem lim chet hilou mihem lim tobang ahi. Hiche bang a tua Metaverse(3D world) mutheina dia Augmented Reality(AR) glasses kituo le hithei ding, box sung a lup khel ngailou di ahi. Khat kit chu virtual reality (VR) ikituo leh 3D world chu mutheina ahi. Tua jong gaming kichem ho'n ahet di chu VR akibeh ule avatar khat tuo jong kinahthei, kihouthei, lungset thu seitheina ahi. Hiche goh hilou chung a ahshi leh lha ho nai deuva ivet noum jongle VR sung a smartphone ikoi a apps open ibawl le imit kom a ahshi ho muthei ahi.Astronomy Educator(SciComm Company) kapan laiya kei in jong VR hi kahet pan bep ahi. Hiche apat stars, galaxy, planets leh vanlaijol a thilho hi mitkom tah a kive a kijil a mi kihil jiy ahi. AR hi tahsa tah real-world a kijang, VR hi tahsa tah hilouva kisemthu sung a kijang ahi. VR chu PUBG/FIFA game kichep di phaat ei-lang/ei di kilhen theina khu ahi(akichem di chu umsa) . AR hi smartphone ho a pat jahtheina(both virtual & real) ahin VR hi fictional reality bouva jahtheina ahi.

Cryptocurrency ahi kit le eiho hetthei pen dia tahsa tah a um lou, online/virtual sum, thilchohna a manthei, sum tah ho tobang a manchah thei, sum tah a kheldoh kit thei ahi. Hiche virtual currency hi 2008 kum a Satoshi Nakamoto min a hung pien doh a 2009 apat hung kijang pan ahi. Hiche online sum hi tupet a vannoi a haosa pen Aerospace company SpaceX leh Tesla nei Elon Musk jeng in jong ajah ahi. Tua i-sum(tradional currencies) hou hi technology khang dung juiya phaat khat hung bei ding Cryptocurrency in akheldi ahi. Metaverse alolhing khah jongle Cryptocurrency apat metaverse thilho chohthei dia Mark Zuckerberg in jong abawl hidia ginmo ahie(keima lunggel). Cryptocurrency/Bitcoin a investment bawl eimi jong tupet in aum sau sauvin ahi.

Teleportation hi science fiction deu dan a um ahin hijongle atomic level a real life a lolhing ahitai. Teleportation akiti le mun khat apat mun dang khat che louva, phaat lut louva lhung theina ahi. US nache noum le lenna/huikuong ngailouva che theina chu ahi. Hiche teleportation hi leiset apat planets khat le planets dang che na ding, ahshi khat apat ahshi dang che theina dia kibawldoh physics topic khat ahi. Hiche concept hi Mark Zuckerberg in 𝙈𝙀𝙏𝘼𝙑𝙀𝙍𝙎𝙀 a jah ding ati ahi. 

PUBG/Mini-militia game ho a meithal nakhel thei bang a metaverse na lut phaat le navon kheltheina um di, Delhi/Bangalore lah um ho jong innlang Christmas phaat le virtual/online a avatar(eima lim tobang) a ga jaova innsung mite toh atah tobang a kihou theina hidi, innsung mite toh munchom cheh ium khah jongle trip a chekhom theina, Himalaya muol che noum jong che theina, US che khalou jong che theina, vanleng(aeroplane) tou khalou tou theina, tahsa a bawl theilou jouse bawl theina chu ahi.Tekahna, buhkheh laiya nang ho innsung Metaverse apat Himalaya muol nacheu leh atah a Himalaya weather chu namu diu ahi. Hiche um theina jeh chu Virtual Reality (VR) leh Augmented Reality(AR) kigop lhon jeh ahi. 

Metaverse in lolhinna anei le thiemjilna cheh hi jongle doctor ho leh astrophysics/astronomy (space sciences) simlai chapang ho kithopi dehset di ahi. 𝙏𝙝𝙚 𝙂𝙤𝙤𝙙 𝘿𝙤𝙘𝙩𝙤𝙧 series ve kha ho'n ahet diu chu doctor ho'n operation kijilna a gangcha jang louva virtual/online a mihem atah a operation bawl tobang a kijil jiu ahi. Hiche hin thiemjilna lang akhangtousah lheh ding, mihem hinkho beina ijat ham a hiche technology hin ahuhdoh ding ahi. Space sciences simlai ho jong 𝘾𝙊𝙐𝙍𝙎𝙀𝙍𝘼/𝙀𝘿𝙓(International online education) sung a vannoi a university minthang tah Harvard, MIT, Stanford etc ho'n apeh bang a Metaverse sung a course/degree muna thei um ding dan Mark chun asei e. Hiche keu hilouva thiemjilna choum² ho jong 3D a kihilna practical tah a hung um di ahi. 

Lhamasa chun Metaverse lolhinna ding 50 million US dollar 💰investment jong achai tauvin investment kibawlna ho chu occulus VR headsets, AR glasses leh Wristband Technologies ahi.Tulha(Nivember) sung a EU mi sangsom vel hiche company(metaverse) lolhinna dia natong dia lahlutna um ding dan jong Facebook neipa Mark Zuckerberg in anasei e. Metaverse hi kihoutuona(social connections), kisuhlipna(entertainment), kichepna(gaming), Tahsa siemna(fitness), natohna (work environment), Thiemjilna(Education), Sumkolveina(commerce) leh adang dang a mihem te kithopi ding chu ahi. 

Hiche Metaverse(3D world) hitheilou dia(impossible) mihem te'n ana gel khat chu ahi. Hijongle vannoi hetna-chihna khangtou dung juiya lolhing dia um chu ahi. I-pu le pa te'n tunikho hin eimu leu Pathen eihisah liu diu,khonung a itu-le-cha teu khu eiho'n thitheilouna nei leu hen Pathen chung nung iti thei diu mun a um diu ahi. Tunikhoa Mark Zuckerberg (former CEO Fb) thilbawl hi tahsanlou jong um maithei, nuijat jong um mai thei, hinlah abawlgot bawldoh na dia phaat lut lou nangma tah in kumkit sung a na manchah mai thei ahie😊