VANNOI KICHAI DING DAN(THE END OF UNIVERSE)

 ✒AstroMuon Kuki🚀🛰🌙🪐💫

Vannoi kichai ding dan iseima sang'a hetdia khohtah chu itobang vannoiya chen ihiu ham veute. Aleksander Friedmann in vannoi hi achatjing(dynamic) ati tolhon in assumption ni jong abol e. Hichu cosmological principle tia minvo ahi. Khatna chu, vannoi hi hoilamun hijongle ivetna mun jousea pat akibang'e(the universe is isotropic) . Anina chu, vannoi hi hoilaimun kiche jongle akibangsoh e (the universe is homogeneous). Hiche tolhon chun parameter thum asemkit e. 

1.H, vannoi khangdan hetna

2.Omega, vannoi average density tena(measurement) 

3.Lambda, empty space /Dark energy hetna

Omega hi khat sang'a alhom joh le vannoi hi atonsot a khangjing ding, open hi ding, curvature negative hi ding,parallel lines kisuto lou ding, interior triangle degree 180 sang'a lhomjo di ahi. Hiche hi sakol chung'a touna "Saddle" tobang hi ding ahie. Vannoi guon(shape) omega khat sang'a alhom joh leh hitobang hiding ahi. 

Amavang omega khat sang'a atam le vannoi hi closed hiding, curvature positive hi ding, sphere shape hi ding, parallel line kisuto ding, chule angle of triangle 180 sang'a tamdi ti ahi. Tua i-chennao leiset ahi parallel line jong kisuto thei ajeh chu leiset hi spherical in shape ahi. Nisa, Lha, Ahshi le vanlaijol thil atamjo sphere shape ngen ahi. Hiva pat hetthei chu, i-chennao vannoi hi closed le infinite universe ti jeng thei ahi.

 Omega vang khat ahi le universe hi flat le infinite hikitdi ahi. Mihem koima vannoi khel lam'a che aum nai poun hoipen dih ding ham vang photchen ahipoun hijongle tuchan ihetnauva khumkha thei pen chu closed universe a chen ihiuve ti ahi.

Closed Universe chen ihiule nikhokhat le universe hi hung kinung tuol kitna mei a kichai ding ahi. Hichu Big Cruch kiti ahi. Open Universe a chen ihiu leh vang nikho khat leh dapma ithi chai kei diu ahi.

TU'N HOU(religion) APAT VANNOI KICHAI DING DAN ANA VEUTE:

Hindu mythology dung juiya vannoi kichai nikho umlou ding hisang'a 8 billion kum kichaiseh le vannoi kipan thah jing ding ti ahi. Norse mythology in asei chu vannoi kichai ding kuon le Norse Pathen Asgard le Frost giant kidou ding ti ahikit e.

Christianity dung juiya a RAPTURE hung um ding, Jesu christa huhhing pu a kisan ho Jesu'n lah tou ding, aban leh kum thum leh akeh sung'a anti-christ leiset a hung pot doh a vannoi chamna asem ding, Jesu tahsan lou Jews te'n jong tahnsanna anei diu, akicham thei lou Israel leh Arab gam ho kah a chamna um keu hilouva vannoi a chamna hung um ding ahi. Kum thum leh keh kichai phaat leh anti-christ chun tho lom'a ganhing theng lou atuo ding, hiche phaat le chun ahina het doh hi ding hiva pat a chu leiset a gal hung um ding hiche gal chu Armageddon gal akitie. Vannoi a gal lien tah hung um ding, achalpang leh tahsa a 666 ki ta lou jouse'n ima choh thei lou ding, Jesu christa tahsan ho alol ki tang ding ahi. Hiche hi kum thum leh keh ma hi ding ahi. 

RATURE kichaiya chu kum sagi sung gal um ding aban a kum sangleng gam chu hung um ding ahi. Hicheva hi Jesu christa leh atahsan RAPTURE a lah touva um ho leiset a hung kum suh diu,Armageddon gal a ama tahsan mihem ho lah tou leh thutan dia hungsuh ahiuve. Hiche hi 2nd coming tia jong het ahi. 

RAPTURE a chu ama tahsan ho bou vin amu thei ahin 2nd coming a vang Jesu christa tahsan le tahsanlou jouse'n amusoh kei ding ahi. Thutanna aneiya Satan jong kum sangkhat a dia munkhat a ahen a leithah asem a kum sangkhat leiset a hinkho um nalai ding ahi. Hiche hi tua leiset tobang hita lou ding leiset thah hi ding ahi tai. Hichu Christianity tahsan dung juiya vannoi ki chai ding dan ahi.

Vannoi hi science dungjui in stage nga in akihom khen'e.

Stage khat chu PRIMORDIAL ERA(10^ -50 to 10^-5 seconds) akitie. Hiche hi vannoi hung kisem patna Big bang lai ahi. 

Stage ni na chu STELLIFEROUS ERA(10^6 to 10^14 sec) akitie. Hiche hi ahshi, lha leh van a thil um ho kisem pet ahi. Stage thumna chu DEGENERATE ERA(10^15 to 10^39 sec) akitie. Hiche hi vannoi asat hung awl suh phaat sung ahi. Vannoi kisem til a chu sa val a ima hing thei lou ahin phaat chomkhat jouva hung dap suh a leiset a hinna hung um ahi. Hiche stage hi tu phaat hi ahie. 

Stage li na chu ahile BLACK HOLE ERA(10^40 to 100 sec) sung hung hidi ahi.Hiche sung'a hi chung'a ahshi ho hung thi a Black hole kisoh ding ahi. Aban le stage achaina hi DARK ERA(beyond 100 sec) kiti ding ahi. Vannoi a vah ho um tah lou, thao ho kichai phaat a muthim ding, vannoi akipatna lang'a ki nung tuol kit ding ti ahi. Aki nung tuol laisea vannoi hi sa cheh cheh a vannoi hi meiya kichai ding ahie. Tekahna,bu hon na cooker khu gas na heh hat laisea asat cheh bang'a khu heh mit louva na dalhah leh pohkeh thei ahi. Ajeh chu cooker sung'a pressure hat val jeh a hung pokeh tobang'a vannoi jong anung che che leh sa val a ki chai ding ahie. 

Hoiche pen dih ding ham vang koiman i-seithei nai pouve. Ahshithiem(astronomer) ho sei dung jui le scientific data dung juiya vang vannoi hi anungche  le mei(fire) a kichai dia het ahi.Vannoi kichai ding dan hi H, omega leh lambda a kingam ahie. 

"Our only chance of long-term survival is not to remain inward-looking on planet Earth, but to spread out into space"

      ~Stephen Hawking