THE IMPOSSIBLE DREAM

✒Astromuon Kuki🚀🛰🌙💫

“𝙈𝙮 𝙜𝙤𝙖𝙡 𝙞𝙨 𝙨𝙞𝙢𝙥𝙡𝙚. 𝙄𝙩 𝙞𝙨 𝙖 𝙘𝙤𝙢𝙥𝙡𝙚𝙩𝙚 𝙪𝙣𝙙𝙚𝙧𝙨𝙩𝙖𝙣𝙙𝙞𝙣𝙜 𝙤𝙛 𝙩𝙝𝙚 𝙪𝙣𝙞𝙫𝙚𝙧𝙨𝙚, 𝙬𝙝𝙮 𝙞𝙩 𝙞𝙨 𝙖𝙨 𝙞𝙩 𝙞𝙨 𝙖𝙣𝙙 𝙬𝙝𝙮 𝙞𝙩 𝙚𝙭𝙞𝙨𝙩𝙨 𝙖𝙩 𝙖𝙡𝙡.”

Kho ka hin hetthei apat i-kimvel uva nisa,lha,ahsi,vanlaijol a thil um ho leh thilsoh ho hin kana lunggim ji lheh in hitolhon chun hetnoumna lungthim muchi chu awl-awl in ahung khang jing peh in ahi.Jaan tiengleh chung'a ahsi ho kave'n nikho khat leh mihingte jong vanlaijol ah chen hen lang leiset hin kive suh leh ka ti ji lheh e. 

Vannoi(universe) hite ahin leiset tobang mun khat beh a umtei inte jong kati'n ahi.Ajeh vannoi ahin 100 galaxies val aum in galaxy khat ahin 300 billion stars val aum kit in ahi(Nisa jong hi star khat ahi).Khonung leh ban(wall) ah kilhaile thei hen lang,kimanthei(invisible) hen lang,mihing lungthim kisimthei hen lang,ilungthim in mi ki-control hen lang,vanlaijollah vacha bang in kileng le thei le katijiy e.Class-v kasim kum in vanlaijol hi suun changlai tah in muthim aum in;kakhou(Henglep) va tehseho le mitamtah chun ot-in nisa aval'e atiuvin akhuti pen uvin ahi.Hichun mi tamtah tijatna le lunglinglao na alhungkhum keu hilouvin keidia vannoi hetnoumna athahbeh a hung kipat na jong ahipai paitai.Khonung a hiche thilsoh chu eclipse( leiset,nisa leh lha kitohchet a umkhom tieng muthim ji)ahi daan jong kahin hedoh e.Hijongleh tunia houlimna dia kadei chu keima thil hetdoh thu hilouva masang'a ana hitheilou dia kigel tukhang'a hithei ho leh tukhang'a hitheipounte itiu khonung'a hitheidi ho themkhat ana veute.

Edwin Hubble hi daan(Law) jilmi anahi'n hijongleh Jules Verne in vannoi thu asut asimdoh apat apa in phatsah daan(Law) sim talou vin vannoithu(astronomy) lampang ahinsim pan ta'n ahileh 20th century dia vannoi astronomer minthang khat anasohdoh ta'n ahi(King of Telescope jong akiti'n ahi).Jules verne in 1863 chun *Paris in the Twentieth Century*lekhabu anasodoh na a chun 1994 phaat leh Paris khopi a fax machines,world wide comminication network,glass skyscrapers,gas powered auto-mobiles leh high speed elevated trains umdi anasei in hinlah 19th century mite'n hitheipounte atiu chu tu'n ahithei taan ahi(Atusoun pa'n alekhabu chu 1994 a ahin suodoh kit ahi).

Galileo Galilei in leiset leh planet dang hon nisa avel'e(heliocentric model) atileh koiman tahsan in ana nei pou vin ahi.Ajeh chu chuphat laiya Nisa le planet dang jouse'n leiset avelkoul daan a het ahi(Geocentric model/church law).Hijong leh tuhin telescope leh satellite ho jallin Galileo sei adih daan hetchet ahitai.

South America leh Africa gamkhu ivet leh zig-zag abang jieng in kisuto leh kitohchet leidi ahi.Hijongleh mitamtah tahsan dol a masang a iti ana umkhom lhonna tua iti kikhenthei di ham tiloi jong aum'e.Hijongleh akikhen najeh chu plate tectonics(leinoi a suong le soung kitatuo) ahi.Kisei saobe leh 1915 chun Alfred Wagener in Continental Drift Theory apohdoh in asei chu 250 million a continent khatbou Pangea aum'in twipi khatlei Panthalassa in avelkoul e ati.Tukhang'a gamtam tah aum luo najeh chu Pangea pohkeh jeh ahi.

Lord Kelvin(Physicist) in hui sang a gihjo(heavier than air) hithei loudi ati'n,X-ray,Radio ho jong hithei naisai louding ana seiye.Hijongleh tukhang in wright brothers teni'n aeroplane eina sepdoh peh jal un vanlaijol ah ileng le thei taove chubang chun Radio le X-ray jong Alexander Graham Bell leh W.Roentgen in eisem doh peh kit uve. 

Atom sung a nucleus mudoh Lord Rutherford in atomic bomb hithei mong-mong pounte anati'n chuban leh Albert Einstein(Father of modern Physics) in jong hitheiponte tin sei jongle Albert loipa Leo Szilard in 1914 chun ahithei di daan H.G.Wells lekhasut *The World Set Free* chun 1933 leh physicist hon aboldoh di daan aseiye.Hijehchun Albert Einstein in President Franklin Roosevelt lekha athot in kinoptona anei lhon dung juiyin Manhattan Project aboldoh pai uvin World War-2 a Hiroshima leh Nagasaki-ah Fat Man leh Little Boy(Atomic Bomb) ana kilhah a mitamtah hinkhobei chu aga ahi. 

Mihingte sang'a Dinosaurs um masat ding dan koima'n ana tahsan poun ahi. Ajeh chu ana um masat le bolla tua beigam tam tia sei aum kit e.Hijongleh tukhang'a kholdoh dungjui chun 65 millions lai in 6 miles a lien asteroid in leiset ahinse khah jeh a beigamdan hetdoh ahi. 

Lord Kelvin in leiset hi 20-40 millions kumvel bou dan in asei e hichu geologists le Darwanian Biologists mudoh dan toh kikal kit. Khonung in Madam Curie in nuclear force ahin mudoh chun leiset lailung a molten rock ho hi radio active decay jalla 4.2 billion yrs lang hitheiding aseikit e. 

1839 kum chun Albert Einstein in *Blackholes*(ikile lut leh atonsot dia kipotdoh theilou mun) kiti um theilou di ati'n hinlah Hubble Space Telescope leh Chandra X-ray Telescope in aum daan aphotchen e. 

17th century scientist hon Perpetual Motion Machine hitheipounte tia asei jong tukhang in ahithei tai.Eg.steam engine,modern Industrial Society le adang dang. 

Masang khang chun *Philosopher's stone*(lead chu gold suodi) hitheilou dia kigel jong tukhang in *atom smashers* jeh in ahithei kit tai. 

1920s leh 1930s lai chun Robert Goddard in rocket vanlaijolla solthei dan thu asei le 1921 chun "New York Times" editor pa'n,"Professor Goddard in action le reaction ki-relate dan ahepoi,basic knowlege of science jong ahepoi" ti'n ana jumsuo e.Phat ahung che chen Indian Scientist hon jong PSLC-C37/CARTOSAT-2 series(Rocket) 104 khatvei sollin ana soldoh e

Stephen Hawking(astrophysicists) in *Time Travel Impossible* dan aseiye. Ajeh chu physic law apalkeh in amin jong "Chronology Protection Conjecture" atie. Khonung in adihlou dan hilchenna apethei dehpoi. 

Teleportation(munkhat apat mundang khat a kichon theina) hithei pounte kiti jong tu hin atomic scale in *Danube River* ah tohmolso ahitai. 

Michio kaku(Theoretical Physcist) seidung juiyin hitheilou(Impossibe) ho ana veute:

Class-1 IMPOSSIBILITIES 

Hiche hin law of physics akallou ahi.Teleportation,antimatter engines,telepathy,psychokinesis,invisibility ho hi tukhang'a ahithei lou jong leh hung hitheipai di ahitai.

CLASS-2 IMPOSSIBILITIES

Hiche ho jong hetchet hinailou hijongle physics law kallou ahiuve.Time machine,hyperspace travel leh wormholes ho jong hung hithei di ahi.

CLASS-3 IMPOSSIBILITIES

Hiche hin physics law asuhkeh a hitheilou heldi ho ahi.Phaat khat le vang hung hithei maithei ahi.Alien visitation leh mihemte interstellar travel hitheilou phot chu ahitai.

Tu le tua Michio Kaku boipi chu:

1.Time travel

2.Center of blackhole ah ipi aum dem??

3.Big Bang masang ah ipi aum dem??

Achung'a hungkisei ho hunglhung dia tahsan lel na jong nanei maithei,tahsan na jong nanei maithei, ipi hijongle Albert Einstein thusei hin khumkhana hinnei in ka te. 

"𝙸𝚏 𝚊𝚝 𝚏𝚒𝚛𝚜𝚝 𝚊𝚗 𝚒𝚍𝚎𝚊 𝚍𝚘𝚎𝚜 𝚗𝚘𝚝 𝚜𝚘𝚞𝚗𝚍 absur𝚍,𝚝𝚑𝚎𝚗 𝚝𝚑𝚎𝚛𝚎 𝚒𝚜 𝚗𝚘 𝚑𝚘𝚙𝚎 𝚏𝚘𝚛 𝚒𝚝"